Festa de A Fraga. Festa declarada de interese turístico
A festa da Fraga celébrase dende o ano 1904, é unha festa popular,o seu inicio dise que veu de emular a tradición doutras vilas de celebrar despois das festas patronais o patrón pequeno; pois ben, ao remate das festas patronais do Carme de 1904 organizouse por primeira vez o 25 de xullo, día de Santiago a primeira festa da Fraga. Nos seus comezos situouse nunha pequena illa do Eume, no lugar da Balsa, onde a xente organizaba as súas merendas e xogos. Máis tarde, a mediados do século pasado, a festa trasládase á Fraga de dona Rita (chamada así polo nome da propietaria naquel momento deste espazo e hoxe propiedade do Concello) situada moi preto da vila ao pé do río, neste lugar é onde se segue a celebrar actualmente aínda que agora xa integrada como zona verde no núcleo urbano do Concello.
Ao longo do tempo na festa da Fraga fóronse introducindo novidades: máis días de romaría, acompañamento musical de orquestras, grupos de música e baile tradicional e como non, maior presenza e influenza da xuventude nas actividades que se fan ao redor da tradicional romaría.
Neste sentido xorden novas iniciativas como a da posta en marcha no ano 1998 do Festival Folk da Fraga que se celebra o 24 de xullo e que dende entón atrae a veciños e forasteiros ao redor dos mellores grupos, e bandas internacionais e nacionais. Esta e outras actividades tentan unir os intereses da poboación coa tradición da romaría.
No 2004 cumpríronse 100 anos da celebración desta Romaría que acadou co paso dos anos unha importancia fundamental no conxunto das festas de As Pontes e no conxunto das festas de Galicia, obtendo a declaración de Festa de Galicia de interese turístico no ano 2001.
O aumento de romeiros, cun importante número de mozos que se xutan nesta festa, propiciou o aumento significativo de actividades, cunha maior presenza de actuacións de música e baile, a recuperación dos concursos de cabanas, organización de xogos populares, e a consolidación do festival folk, que atraen ao recinto da fraga aos veciños de As Pontes e moitos forasteiros que se achegan ao noso concello por estas datas.
